ចេញផ្សាយ៖ថ្ងៃទី៧ខែសីហាឆ្នាំ២០២៦
កងរាជឣាវុធហត្ថខេត្តបញ្ជូនជនសង្ស័យម្នាក់ ទៅសាលាដំបូងខេត្ត ពាក់ព័ន្ធករណីនាំយកចេញដោយមិនស្របច្បាប់សម្រាប់នាំឆ្លងដែននិងប្រើប្រាស់ដោយខុសច្បាប់នូវសារធាតុញៀន
ខេត្តបន្ទាយមានជ័យ៖កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ឈរជើងតាមព្រំដែនកម្ពុជា–ថៃ សរុបចំនួន០៥នាក់ រថយន្តចំនួន០១គ្រឿង នៅវេលាម៉ោង០៦និង៣០នាទី ថ្ងៃទី០៥ ខែសីហា ឆ្នាំ២០២៦ ដឹកនាំដោយ លោកវរសេនីយ៍ទោ អ៊ុ រ៉ាត់នាយសេនាធិការរងកងរាជអាវុធហត្ថខេត្តបន្ទាយមានជ័យ សហការជាមួយកម្លាំងវរសេនាតូចនគរបាលការពារព្រំដែនគោកលេខ៩១១ បានដាក់ប៉ុស្តិ៍សង្កេតការណ៍តាមខ្សែបន្ទាត់ព្រំដែន នៅចំណុចក្រោយវត្តជាយដែន ស្ថិតក្នុងភូមិព្រៃព្រិច សង្កាត់អូរជ្រៅក្រុងប៉ោយប៉ែត ខេត្តបន្ទាយមានជ័យ ប្រទះឃើញជនសង្ស័យចំនួន០៣នាក់ ក្នុងនោះស្រីចំនួន០១នាក់ កំពុងលួចឆ្លងដែនដោយខុសច្បាប់ចេញពីប្រទេសកម្ពុជា ចូលទៅប្រទេសថៃ។ ភ្លាមនោះកម្លាំងចម្រុះបានឃាត់ខ្លួនមនុស្សនោះ០៣នាក់រួមមាន៖១.ឈ្មោះ ភិន សុណាវិន ភេទប្រុស អាយុ៤០ឆ្នាំ ជនជាតិខ្មែរ, ២.ឈ្មោះ ប៊ូ ខឿន ភេទប្រុស អាយុ៤៦ឆ្នាំ ជនជាតិខ្មែរ, ៣.ឈ្មោះ តែផាន់ឌីណា ភេទស្រី អាយុ៤១ឆ្នាំ ជនជាតិខ្មែរ រួមទាំងវត្ថុតាងមួយចំនួន ហើយនាំមកកាន់មូលដ្ឋានកងរាជអាវុធហត្ថក្រុងប៉ោយប៉ែតដើម្បីសួរនាំទៅតាមនីតិវិធី។ ក្រោយពីបានសួរនាំរកឃើញថា ឈ្មោះ ភិន សុណាវិន គឺជាមេខ្យល់នាំមនុស្សឆ្លងចេញចូលប្រទេសថៃដោយខុសច្បាប់ ហើយកម្លាំងជំនាញបានធ្វើតេស្តទឹកនោមពិនិត្យរកសារធាតុញៀន ជាលទ្ធផលវិជ្ជមាន(+) ចំណែកឈ្មោះ ប៊ូខឿន និងឈ្មោះ តែ ផាន់ឌីណា គឺជាជនរងគ្រោះ ត្រូវមេខ្យល់ខាងលើនាំចេញដោយខុសច្បាប់ទៅប្រទេសថៃ។ យោងតាមបទបញ្ជាលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងឯកឧត្តម កើត វណ្ណារ៉េតព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យ បានអនុញ្ញាតឱ្យសមត្ថកិច្ចធ្វើកិច្ចសន្យាចំពោះជនរងគ្រោះឱ្យវិលត្រឡប់ទៅលំនៅដ្ឋានវិញ។
លោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងថា ចំពោះជនសង្ស័យ៖ ក្រោយស្ដាប់ចម្លើយ ពិនិត្យឃើញថាពិតជាមានការស៊ីសង្វាក់គ្នាយ៉ាងជាក់លាក់ពីតម្រុយករណីខាងលើ រងការចោទប្រកាន់លើករណីនាំយកចេញដោយមិនស្របច្បាប់សម្រាប់នាំឆ្លងដែន និងប្រើប្រាស់ដោយខុសច្បាប់នូវសារធាតុញៀន។ ដោយផ្អែកលេីចម្លេីយសារភាពនិងមានជនរងក្រោះជាក់ស្តែង កម្លាំងមូលដ្ឋានកងរាជអាវុធហត្ថក្រុង កសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ។ បច្ចុប្បន្ន ជនសង្ស័យត្រូវបានកម្លាំងការិយាល័យជួញដូរមមនុស្សនិងការពារអនីតិជន កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃសុក្រ ទី០៧ខែសីហា ឆ្នាំ២០២៦នេះ ដើម្បីអនុវត្តតាមនីតិវិធី៕
