ព្រះមហាក្សត្រ និងសម្ដេចម៉ែ បានយាងនិវត្តន៍ពីទីក្រុងប៉េកាំង ប្រទេសចិន ត្រឡប់មកដល់មាតុប្រទេសវិញដោយសុវត្ថិភាពហើយ ក្រោយពិនិត្យ និងព្យាបាលព្រះរាជសុខភាព

ចេញផ្សាយ៖ថ្ងៃទី៣ ខែកក្តដា ឆ្នាំ២០២៦

ភ្នំពេញ ៖ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល នៅរសៀលថ្ងៃសុក្រ ទី០៣ខែកក្កដា ឆ្នាំ២០២៦នេះ បានយាងនិវត្តន៍ពីទីក្រុងប៉េកាំង សាធារណរដ្ឋប្រជាមានិតចិន មកកាន់មាតុភូមិកម្ពុជាវិញដោយសុវត្ថិភាពហើយ បន្ទាប់ពីព្រះអង្គទាំងទ្វេបានយាងគង់ប្រថាប់ដើម្បីពិនិត្យ និងព្យាបាលព្រះរាជសុខភាពអស់រយៈពេលជាច្រើនខែ។ ការយាងនិវត្តន៍របស់ព្រះអង្គទាំងទ្វេ គឺជាដំណឹងដ៏រីករាយ និងមហាមង្គលសម្រាប់ប្រជារាស្ត្រខ្មែរទូទាំងប្រទេស។

វត្តមានដ៏ថ្លៃថ្លារបស់ព្រះមហាក្សត្រ និងសម្ដេចព្រះវររាជមាតាជាតិខ្មែរ នៅលើទឹកដីមាតុភូមិសាជាថ្មីម្ដងទៀត បានឆ្លុះបញ្ចាំងពីព្រះរាជសុខភាពដ៏ប្រសើរឡើងវិញ បន្ទាប់ពីទទួលបានការយកព្រះទ័យទុកដាក់ខ្ពស់ពីសំណាក់ក្រុមគ្រូពេទ្យជំនាញរបស់មិត្តចិន។ព្រះរាជវត្តមានរបស់ព្រះអង្គទាំងទ្វេ តែងតែជាម្លប់ដ៏ត្រជាក់ត្រជុំ និងជាទីគោរពសក្ការៈដ៏ខ្ពង់ខ្ពស់បំផុតសម្រាប់ប្រជារាស្ត្រខ្មែរគ្រប់រូប។ ព្រះអង្គទាំងទ្វេតែងតែយកព្រះទ័យទុកដាក់ខ្ពស់ចំពោះសុខទុក្ខរបស់ប្រជារាស្ត្រ និងបានបំពេញព្រះរាជកិច្ចជាច្រើនដើម្បីបុព្វហេតុជាតិ និងប្រជាជន។

ក្នុងអំឡុងពេលគង់ប្រថាប់នៅទីក្រុងប៉េកាំង ព្រះមហាក្សត្រ និងសម្ដេចព្រះវររាជមាតាជាតិខ្មែរ បានទទួលនូវការថែទាំសុខភាពយ៉ាងយកចិត្តទុកដាក់បំផុតពីសំណាក់ក្រុមគ្រូពេទ្យចិន ដែលជាមិត្តដ៏ជិតស្និទ្ធរបស់កម្ពុជា។ ទំនាក់ទំនងមិត្តភាពដ៏យូរអង្វែងរវាងកម្ពុជា និងចិន ត្រូវបានពង្រឹង និងពង្រីកកាន់តែរឹងមាំឡើងជាលំដាប់ ទាំងក្នុងវិស័យការទូត សេដ្ឋកិច្ច វប្បធម៌ និងជាពិសេសវិស័យសុខាភិបាល។ ការគាំទ្រផ្នែកវេជ្ជសាស្ត្រនេះ គឺជាសក្ខីភាពមួយបង្ហាញពីចំណងមិត្តភាពដែកថែបដែលមិនអាចកាត់ផ្ដាច់បានរវាងប្រទេសទាំងពីរ។

ប្រជារាស្ត្រកម្ពុជាទូទាំងប្រទេស បានសម្តែងនូវសេចក្តីអំណរ និងមោទកភាពយ៉ាងក្រៃលែងចំពោះការយាងនិវត្តន៍របស់ព្រះអង្គទាំងទ្វេ។ ព្រះរាជវត្តមានរបស់ព្រះមហាក្សត្រ និងសម្ដេចព្រះវររាជមាតាជាតិខ្មែរ គឺជាកម្លាំងចលករដ៏សំខាន់ក្នុងការលើកស្ទួយស្មារតីជាតិនិងជាសញ្ញានៃសន្តិភាព ស្ថិរភាព និងការរីកចម្រើនរបស់ព្រះរាជាណាចក្រកម្ពុជា។ ព្រះអង្គទាំងទ្វេ គឺជាបិតា និងមាតាជាតិ ដែលតែងតែគង់នៅជាម្លប់ដ៏ត្រជាក់ត្រជុំសម្រាប់កូនចៅប្រជារាស្ត្រខ្មែរជានិច្ចនិរន្តរ៍។

សូមជម្រាបថា សម្តេចព្រះមហាក្សត្រី ព្រះវររាជមាតាជាតិខ្មែរ និងព្រះមហាក្សត្រ នៃព្រះរាជាណាចក្រកម្ពុជា បានយាងទៅពិនិត្យព្រះរាជសុខភាព នៅរដ្ឋធានីប៉េកាំង នៃសាធារណរដ្ឋប្រជាមានិតចិន កាលពីថ្ងៃទី២៧ ខែកុម្ភៈ ឆ្នាំ២០២៦។ព្រះមហាក្សត្រ និងសម្ដេចព្រះវររាជមាតា តែងតែយាងទៅពិនិត្យព្រះរាជសុខភាព នៅប្រទេសចិន២ដង ក្នុងមួយឆ្នាំ តាមការយាងរបស់ក្រុមគ្រូពេទ្យចិន៕